Mótið er opið fyrir hjón og pör sem eru 20 ára og eldri. Á föstudeginum er leikinn fjórleikur (Betri bolti) og á laugardeginum fjórmenningur (Greensome). Mótinu lýkur með lokahófi í golfskálanum á laugardagskvöldinu. Leikfyrirkomulag er punktakeppni með forgjöf. Hámarksforgjöf er 24 hjá körlum og 28 hjá konum.

Gert er ráð fyrir að karlar leiki af gulum teigum og konur af rauðum. Karlar 65 ára og eldri geta spilað af rauðum teig og skulu þá tilkynna það ræsi.

Í fjórmenningi er leikforgjöf liðs 60% af lægri leikforgjöf + 40% af hærri leikforgjöf. Samherjar slá báðir upphafshögg og velja hvaða bolti er betri og slá síðan til skiptis þar til í holu er komið. Annað högg slær sá sem ekki á upphafshöggið sem var valið. Seinni daginn verður ræst út eftir skori fyrri dags þannig að besta skor er ræst út síðast.

Mótsgjald er 38.000 kr fyrir parið. Innifalið í verðinu er glæsilegt tveggja daga mót, verðlaun fyrir efstu sætin (GolfSaga ehf.), nándarverðlaun á öllum par 3 brautum (66°Norður), teiggjöf og kvöldverður í lokahófinu. DJ Hlynur leikur fyrir dansi.

Ræst verður út frá kl 10 til 14 á föstudaginn og verða rástímar sendir út Þegar skráningu í mótið er lokið.