Gunnar Þorláksson og Þórhalli Einarsson hlutu fyrstir félagsmanna gullmerki GKB en gullmerkið er veitt þeim aðilum sem hafa unnið mikið og óeigingjarnt starf í þágu GKB í langan tíma. Er þetta leið klúbbsins til að þakka kærlega fyrir það framlag.

Gunnar hefur setið í stjórn GKB frá stofnun klúbbsins árið 1993 og verið formaður vallarnefndar. Hann hefur eytt ómældum vinnustundum og komið að klúbbnum með einum eða öðrum hætti frá upphafi, hefur verið drifkraftur frá byrjun og á mikinn þátt í uppgangi GKB. Ef eitthvað hefur komið upp á hefur Gunnar ætið verið fyrsti maðurinn til að bregðast við.

Þórhalli hefur setið í stjórn GKB lengur en margir menn muna, verið í mótanefnd og í núverandi vallarnefnd auk þess að hafa verið formaður GKB frá 2017 til 2019.

Það er ómögulegt að segja hvað þessir dugnaðarforkar hafa eytt miklum tíma í þágu klúbbsins. Sumir telja í mánuðum, aðrir í árum. Þeir þekkja hverja þúfu á golfvellinum hvort sem hún er snöggslegin eður ei. Óhætt má segja að þeir eigi mikinn þátt í núverandi stöðu GKB og er klúbburinn þeim drengjum mjög þakklátur .