Meistaraflokkur karla tók forskot á sæluna og lék sitt meistaramót sunnudaginn 29. júní.  Gunnar Þór Heimisson sigraði og lék 36 holur á 150 höggum, eða 8 höggum yfir pari. Aðrir flokkar hefja leik í meistaramótinu á fimmtudag og föstudag. Lokahóf verður síðan í golfskálanum á laugardagskvöld.

Alls tóku þrettán keppendur þátt í meistaraflokki og spiluðu í ágætis veðri sl. sunnudag. Eins og áður segir var það Gunnar Þór sem stóð uppi sem sigurvegari, en hann vann með minnsta mun því Pétur Freyr Pétursson lék á 151 höggi. Klúbbmeistarinn frá í fyrra, Andri Jón Sigurbjörnsson, varð þriðji á 152 höggum.

Það er stutt stund milli stríða hjá Gunnari Þór því hann hélt til Ungverjalands í þessari viku til að keppa fyrir Íslands hönd í Evrópumóti piltalandsliða.

Við óskum Gunnari Þór til lukku með titilinn og góðs gengis í Ungverjalandi!

Mynd: Gunnar Þór klúbbmeistari ásamt Gunnari afa sínum, sem er oftast kylfusveinn fyrir kylfinginn unga.